Если я говорю языками человеческими и ангельскими, а любви не имею, то я - медь звенящая или кимвал звучащий
(1Кор.13:1)

АКАФИСТ МОЛЧЕНСКОЙ ИКОНЕ БОЖИЕЙ МАТЕРИ, ЧТО В ЖЕНСКОМ ПУТИВЛЬСКОМ ПЕЧЕРСКОМ МОНАСТЫРЕ

Сложен из похвальных слов Святых Отцов

Пресвященный Ионафан (Елецких), архиепископ Глуховский и Конотопский

Икона Божией Матери Молченская — чудотворный образ Пресвятой Богородицы, главная святыня Молченского Богородице-Рождественского Печерского монастыря в городе Путивле (Украина, Сумская область).

По преданию, икону в начале XIV века принесли с собой из Киева два монаха. Они поселились близ Путивля в болотистой местности под названием Молча. В сентябре 1405 года бортник (пчеловод), собиравший в лесу дикий мед, увидел эту икону на дереве, окруженную сиянием. Узнав о чудесном явлении, из Путивля в Молчу поспешили люди, и в тот день от иконы получили исцеление многие больные. На этом месте был построен монастырь, который в 1605 году был разрушен поляками. Монахи унесли чудотворную икону в пределы Русского Московского Царства, - в Путивль, где построили другой монастырь, который стал называться Молченским Печерским. В 1653 году стараниями монаха Софрония старый Молченский монастырь был восстановлен на прежнем месте и получил название Софрониевского.

В начале XVIII века чудотворная икона сгорела, но в Софрониевском монастыре сохранился ее точный список, который прославился многочисленными чудесами и по праву занял место прежней святыни. После революции оба Молченских монастыря были закрыты, чудотворную икону спрятали местные жители.

В 1995 году чудотворный образ был найден в доме престарелого священника и перенесен архиепископом Глуховским и Конотопским Ионафаном (Елецких) в возрожденный монастырь в Путивле. Архиепископ Ионафан из похвальных слов Святых Отцов Церкви сложил богородичный акафист в память её второго обретения, который там доныне читается инокинями.

 А К А Ф И С Т 

МОЛЧЕНСКОЙ ИКОНЕ ПРЕСВЯТОЙ БОГОРОДИЦЫ (ПУТИВЛЬСКОЙ)

ТВОРЕНИЯ ПРЕОСВЯЩЕННОГО ИОНАФАНА (ЕЛЕЦКИХ),

АРХЕПИСКОПА ГЛУХОВСКОГО И КОНОТОПСКОГО


Кондак 1 

Избранной от всех родов Деве Пречистей Богородице, принесем, вернии, сие малое похвальное пение, пред честною явленною Ея иконою, юже земля Путивльская имуще источник исцелений, блгодарствeнно верою взывает: Радуйся, Пресвятая Дево, oбители Молченския радосте и утверждение. 

 

Икос 1 

Ангели предидяху Пресвятей, eгда изволи внити во Святая Святых, ангельския силы предстояху и лику Пречистыя, eгда явися икона Ея близ блата Молченскаго благоговейному бортнику, иже слыша глас таинственный: "Да созиждется на месте сем церковь Пресвятыя Богородицы”, возвратися во град Путивль, вопиюще таковая:

 

Радуйся, Исполнение благое, совета Святыя Троицы,
Радуйся, Лучу пресветлый, роду человеческому,
Радуйся, Усладо сладчайшая, душ изнемогающих,
Радуйся, Любове Христова, отчаянным радование,
Радуйся, Фимиаме многоценный, Христом благоухающий,
Радуйся, Храме одушевленный, Богом устроенный,                                            Радуйся, Пресвятая Дево, oбители Молченския радосте и утверждение. 

 

Кондак 2 

Велие промышление Божие явися, егда иноцы Киево-Печерстии основаша на Молче скит, иже по летех Софрониевым нарицашеся. И тако благословение преподобных Антония и Феодосия граду Путивлю бысть, иже взываша Богу песнь: Аллилуиа.

 

Икос 2

Свет осия явленную икону, eгда Божиим промышлением явися дивно на древе. К сей вернии притекающе, исцеление от недуг душевных и телесных обретаху, благодарствeнно поюще Богородице таковая:

Радуйся, Целительнице милосердная, ран душевних,
Радуйся, Пристанище небурное, посреде помыслов суетных,
Радуйся, Убежище пространное, от демонов стужаемым,
Радуйся, Забрало крепкое, девства истиннаго,
Радуйся, Палато спасения, Господа во плоти приявшая,
Радуйся, Ветве целомудренная, Христом процветшая,                                  Радуйся, Пресвятая Дево, oбители Молченския радосте и утверждение. 

 

Кондак 3

Егда видеша людие путивльстии чудеса от явленныя иконы Молченския oбильно источаемыя, тогда создаша скоро церковь во имя Пречистыя, взываюше Богу: Аллилуиа.

 

Икос 3

Яко звезду боготечную пренесоша иноцы молченстии, благословением игумена Пафнутия, явленную икону во обитель Печерско-Путивльскую, разорения агарянскаго ради, поюще Богородице таковая:


Радуйся, Разрешение послушанием, Евина преслушания;
Радуйся, Попрание вечное, смерти Адамовы.
Радуйся, Ложе непорочное, Божественнаго воплощения;
Радуйся, Плененная от Духа Свята, Своею волею.
Радуйся, Соцарствующая Сыну Своему, Христу Богу нашему;
Радуйся, Каменю драгий, в чертозех Единосущныя Троицы.                            Радуйся, Пресвятая Дево, oбители Молченския радосте и утверждение.

 

Кондак 4

Мост к небеси воистину явися икона Молченская: мнози бо притекающе к eя заступлению и видяще знамения милости Господней от нeя источаемыя, покаяние обретаху и тако жизни нескончаемей причастницы быша, поюще Богу: Аллилуиа. 

 

Икос 4

Дева днесь на небесех ликовствует, зря икону Свою любовию лобызаему. Сего ради неоскудно подает Пречистая велию милость чтущим ю и верою взывающим таковая:

 

Радуйся, Помазание царственное, естества человеческаго,
Радуйся, Крыло ветренное, Имже Облако Христос прииде,
Радуйся, Уста апостольския, вся концы вселенныя просвещающия,
Радуйся, Сосуде избранный и освященный Духом Святым,
Радуйся, Приятелище пренепорочное, Безначальнаго Слова Божия,
Радуйся, Луно сияющая, во след Солнца Правды Грядущая.                          Радуйся, Пресвятая Дево, oбители Молченския радосте и утверждение.

 

Кондак 5

Волчцы и тернии собраша себе иноплеменницы иногда, иже пришедши со Димитрием Самозванцем во oбитель Молченскую, злоумыслиша противу Земли Русския, иконы явленныя не устыдишася. Сего ради разори Бог совет нечестивых, молитвами Пресвятыя Богородицы, Ему же вопием: Аллилуиа.

 

Икос 5 

Велия слава иконы Молченския во вся концы земли русския пройде. Сего ради Самодержцы православныя Феодор и Иоанн, Алексий , София правительница  и Царь Петр Великий утвердиша обитель Молченскую во благостоянии, блгодарственно взывающе Богородице таковая:

 

Радуйся, Заступление крепкое, Земле Русстей,
Радуйся, Разорение скорое, злоухищрений иноплеменных,
Радуйся, Наставление свыше, Царем православным,
Радуйся, Низложение долу, гордыни демонския,
Радуйся, Мир Божий людям стране Северския принесшая,
Радуйся, Бога – Господа благословеннаго нам явившая,                               Радуйся, Пресвятая Дево, oбители Молченския радосте и утверждение. 

 

Кондак 6 

Милость воссия Тобою, Владычице, eгда иконою Своeю град Путивльский и веси oкрестныя от смертоносныя язвы избавила еси, наставляюще сим верныя присно прибегати к Твоему заступлению в бедах и болезнех, вопиюще Богу: Аллилуиа.

 

Икос 6

Ангельския силы на небесех непрестанно славословят Тя, Царице ангелов: у престола бо Божия предстоиши, венцем небесным украшенная, моляще Сына Своего о спасении душ наших. Темже иконе явленней со страхом покланяющеся, именуем Тя, Пренепорочная, имены таковыми:

Радуйся, Скрижале одушевленная, заповедей Божиих,
Радуйся, Престоле Агнчий, Емуже предстоят ангели,
Радуйся, Кивоте святыни, от Духа приосененный,
Радуйся, Законе благодати, перстом Творца написанный,
Радуйся, Устрашение грешников и демонов уязвление,
Радуйся, Ликование мучеников и Церкве украшение.                                        Радуйся, Пресвятая Дево, oбители Молченския радосте и утверждение. 

 

Кондак 7

Риторы суемудрeннии недоумеваху: како может Пречистая явленною иконою Своeю подавати верным вся просимая? Мы же, Божественным Преданием научаеми, яко честь иконе воздаваемая, на Первообразное восходит, ведающее такожде,  яко и сень Петрова исцеляше верныя, почитаем Лик Ея явленный, вопия Богу: Аллилуиа.

 

Икос 7

Како почтим чудотворную икону Молченскую, eюже Пречистая благодать возблагодать дарова людем Своим? Како наречем сей источник исцелений в земле Путивльстей? Немотствует язык воспети небесная словесы земными. Oбаче втор ое обретение чтимаго списка oбраза празднующе, дерзаем взывати Богородице таковая:


Радуйся, Горо таинственная, превыше житейских помышлений,
Радуйся, Воззвание изгнанных, правды ради Царствия Небесного,
Радуйся, Лествице духовная, Еюже людие на Небеса возвышаются,
Радуйся, Богосветлый светильниче, от Него же Сын возсия,                              Радуйся, Богоносная Ниво, на Нeйже Древо Жизни произрасте,
Радуйся, Благословение Христово, священству новому.
Радуйся, Пресвятая Дево, oбители Молченския радосте и утверждение. 

 

Кондак 8

Неоскудеваемый источник благодати явися чтимый образ Богоматере Молченския, от пресвитера путивльскаго многи леты хранимаго безбожных ради, иже паки разориша люто обитель Молченскую. Ныне же новомученицы Земли Русския и исповедницы oбители Молченския поминающе, со умилением лобызаем икону сию, вопиюще Богу: Аллилуиа. 

 

Икос 8

О, торжество новое, о, празднество светлое! Се собрашася во второе обретение чтимаго oбраза архиереи и священницы, иноцы и простии, иже с пении перенесоша икону явленную во oбитель Молченскую, вопия Богородице таковая:

Радуйся, Руно Давидово, на него же Слава Отча сниде,
Радуйся, Стамно златая, из Нeя же Христос произыде,
Радуйся, Тобою бо изгнася во вселенней тьма идольская,
Радуйся, Тобою бо возсия верным Свет Разума,
Радуйся, херувимов и серафимов Воеводо честнейшая,
Радуйся, вознесением Своим в небесную Славу, Илию превзошедшая,
Радуйся, Пресвятая Дево, oбители Молченския радосте и утверждение. 

 

Кондак 9

Притецем, людие, к Богоневесте Владычице: Мати бо истинная воплощеннаго Сына Божия явилася eси. Ибо неизреченно в лоне Ея, аки в горниле небеснем, неслитно и нераздельно соединишася два eстества Христовы, от Него же Церковь, Питием новым в жизнь вечную напаяема, вопиет Богу: Аллилуиа. 

 

Икос 9 

Воистину спасительна есть обитель Молченская, имуще заступлением икону явленную Твою, Богородице. В ней же иноцы, мир суетный оставиша Царствия ради Христова, подвигом веры, поста и молитвы подвизашеся, присно же приносят Непорочней похвальная пение. С ними же и мы воззовем Богородице таковая:

Радуйся, Ключу Христов, Имже врата Рая открышася,
Радуйся, Венче святый, Троицы eдиносущныя,
Радуйся, Звездо утренняя, Свет Невечерний родившая,
Радуйся, Лампадо теплая, во тьме мира сего светящая,
Радуйся, Правило веры, благочестию наставляющая,
Радуйся, Игумение пречудная ангельскаго воинства,
Радуйся, Пресвятая Дево, oбители Молченския радосте и утверждение. 

Кондак 10

Воспевают Тя, Пресвятая Дево, патриарси и пророцы, мученицы и безсребреницы, священницы и бельцы. Аще бо не Ты, Владычице, то коликих бед избегли бы тогда? Коликих слез более пролияху людие в горести своей? Сих удалишася, ублажает Тя род человеческий, поюще Богу песнь: Аллилуиа. 

 

Икос 10

Тайно eсть рождество Твое, Дево, от неплодных Иоакима и Анны. Тайно явление Лика Твоего на древе близ блата Молченскаго. Тамо неплодныя - детородители содеваются, зде же пустынныя души к плодоношению духовному уготовляются, во eже звати Ти таковая:

Радуйся, Ево новая, новаго Адама родившая,
Радуйся, Реко благодати, в раю Божием текущая,
Радуйся, Тишино смущенных и Пристанище обуреваемых,
Радуйся, Роса Божия, душевныя пустоши орошающая,
Радуйся, Неусыпная Ходатаице, взыскующих спасення,
Радуйся, Оградо несокрушимая, Церквe православныя,
Радуйся, Пресвятая Дево, oбители Молченския радосте и утверждение. 

 

Кондак 11

О, Божественное снисхождение! О, Чудо любве Божия! Рабу бо Свою Бог Материю Света содела, о Нeй же Дух Святый глаголет: «Красуйся и веселися Дщи Сионова, яко к Тебе Аз гряду». Темже верою покланяющеся Лику Твоему во иконе Молченстей, вопием вси Богу песнь: Аллилуиа. 

 

Икос 11

Дугу новую устави Тя Господь, Пречистая: Мати бо милостивая на небеси и на земли явися вочеловечением Сына Божия. Сего ради, поюще воплощение Христа Бога нашего, вопием Богородице таковая:

Радуйся, Елеоне истинный, из Нея же Христос вознесеся,
Радуйся, Ризо златовидная, от Духа сотканная,
Радуйся, Заступнице неложная, пред Судией Праведным,
Радуйся, Надеждо светлая, воскресения вечного,
Радуйся, Дуго живоносная, Слова воплощеннаго,
Радуйся, Мирохранительнице новая, Мира неистощимаго,
Радуйся, Пресвятая Дево, oбители Молченския радосте и утверждение. 

 

Кондак 12

О, дивное чудо! Благоволила бо Богородица в иконе Своeй в Путивль град приидти из пустыннаго блата Молче. Такожде и души наша воззови, Пречистая, из блата греховнаго, да принесем вси песнь о Тебе Богу: Аллилуиа. 

 
Икос 12

Велие торжество бысть обретение чтимаго списка  иконы Богоматере Молченския, имже, яко омофором, покрывает Пренепорочная град Путивльский во стране Северстей, и всю Землю Русскую. К Нейже же воззовем со умилением таковая:

Радуйся, Лозо живая, Божественнаго вертограда,
Радуйся, Розо цветущая, девством благоухающая,
Радуйся, Избавление конечное, лести идольския,
Радуйся, Начаток истинный, Божественнаго возсоздания,
Радуйся, Ликование вечное, ангельских хоров,
Радуйся, Ублажение присное, рода человеческаго,
Радуйся, Пресвятая Дево, oбители Молченския радосте и утверждение. 

 

Кондак 13

О, Всемилостивая Госпоже, Мати Господа и Бога нашего Иисуса Христа и всесвятая Игумение oбители Молченския, Покрове града Путивльскаго и страны Северския и всeя земли Русския! Нынешнее наше малое сие моление пред святою иконою Твоeю приемше, от всяких бед и напастей свободи рабы Твоя, Богородице. Души наша скоро изведи из блата греховнаго и делами милосердия и любовию Твоeю оживотвори, да всегда благодарственно воспоем о Тебе песнь Богу: Аллилуиа.

Сей кондак глаголи трижды  и затем паки чтется 1-й Икос и Кондак 1-й. 

МОЛИТВА 

О, Мати Света, Преблагословенная Богородице Дево, взываю Ти в окаянстве моем: не имамы бо слез покаянных, ни сокрушения сердечнаго, ниже вопля душевного о беззакониех моих.  Ныне предстою аз явленней на блате Молченстей иконе Твоeй и смиренно молю Тя: вниди и во блато греховныя души моея и во источник чистыя веры претвори ю. Взыди на ветхое древо моего мудрования и новою порослью добрых дел обогати его, слепоту мою душевную светом благодати осияй, сокруши камень сердца моего и во благоуханный воск свещи, горящий любовию, премени. Да яко добрый бортник, услышу аз повеление сотворити в себе храм Твой, Пречистая, совершающе хвалу Тебе, Досточудная, во веки. Аминь .

Тропарь, глас 4.

Веселится ныне обитель Молченская, /  иже  во граде Путивле сущая, / обрела бо паки икону Богородицы, / исцеление душам и телесем верным подающую./ Сего ради едиными усты ныне взываем:/ Радуйся,  Пресвятая Дево,  / oбители Молченския радосте и утверждение.

Кондак, глас 1.

Во блате Молченстем явися икона Твоя, Богородице, / светом благодатным сердца наша озаряющая,  / души же и телеса верных исцеляющая / и благодать присно источающая. / Темже во умилении Тебе вопием: / Радуйся,  Пресвятая Дево,   oбители Молченския радосте и утверждение.

Величание 

Величаем Тя, / Мати Христа Бога нашего, / от блата Молченскаго икону Свою нам явившую / и от бед и болезней присно нас избавляющую.

 Празднование 18 сентября/1 октября и 24 апреля/7 мая

 

 

Вернуться к списку статей