Если я говорю языками человеческими и ангельскими, а любви не имею, то я - медь звенящая или кимвал звучащий
(1Кор.13:1)

АКАФИСТ РОЖДЕСТВУ ПРЕСВЯТОЙ БОГОРОДИЦЫ

Из похвальных слов Святых Отцов Церкви сложенный

Архиепископ Сумской и Ахтырский Ионафан (Елецких)

А К А Ф И С Т

ИКОНЕ РОЖДЕСТВА ПРЕСВЯТОЙ БОГОРОДИЦЫ

ИЗ ПОХВАЛЬНЫХ СЛОВ СВЯТЫХ ОТЦОВ

АРХИЕПИСКОПОМ ХЕРСОНСКИМ И ТАВРИЧЕСКИМ

ИОНАФАНОМ СЛОЖЕННЫЙ

Херсон, 2004 

 

МОЛИТВА ПРЕД ЧТЕНИЕМ АКАФИСТА

О, вспетая Мати и Дево, паче всех лучей солнечных трисветлым сиянием блистающая! Отверзи, молим Тя, наши недостойныя уста и подаждь свыше слово благое, да возможем достойно ублажити Тя, яко Всесвятый Начаток рода нашего и Матерь Бога Истиннаго. Сподоби нас присно воспевати Тя в собрании верных и пред лицем не почитающих Тя и не исповедующих, яже мудрствует о Тебе Святая Церковь Православная. Да молитвами Твоими Царства Небеснаго достигше и одесную Престола Божия стояще, прославим тамо вси Сына Твоего и Бога нашего со Отцем и Святым Духом во веки веков. Аминь.

 

Кондак 1

Избранной от всех родов Деве Богородице / принесем сия похвальная пения / пред пречистым образом преславнаго Ея рождества, / иже дарует исцеления всем, с верою притекающим. / От всяких нас бед соблюди, да зовем Ти /: Радуйся, Пресвятая Дево, рождеством Своим спасение всем возвещающая /.

 

Икос 1

Ангел Предстатель послан бысть свыше возвестити нераждающей и неплодней Анне рождество Твое, Богородице: «Днесь приимеши во чреве Плод благославный и родиши Мариамь благословенную». Мы же, со страхом святей иконе Рождества Твоего предстояще, яко Тебе Самей в ней Сущей, аще и бренными усты, с Гавриилом чиноначальником зовем Ти таковая:

Радуйся,  яко Тобою Христос возсияет,

Радуйся, яко Тобою вражда исчезнет,

Радуйся, Начало Предвечнаго Совета Божия,

Радуйся Пределе таинственных обетований,

Радуйся, Рождение чистое горлиц праведных,

Радуйся, одушевленная новая Скиние,

Радуйся, Троицы Слово в Себе приемшая,

Радуйся, на небеса Богом Призванная,

Радуйся Пресвятая Дево, рождеством Своим спасение всем возвещающая.

 

Кондак 2

Се отверзаются бесплотныя врата и являются Божественныя врата девическия, имиже Сый Бого, плотию от Девы, яко порфирою светлою облечеся, вниде во вселенную, спасение подая верным. С ними же и мы Богу, благоволившему тако, вопием: Аллилуя.

 

Икос 2

Плодоносная Лоза прозябе днесь от Анны, на ней же Грозд сладчайший – Христос произрасте, источающий Питие земнородным, яже в жизнь вечную. Ликует земля и веселятся о сем чада церковная, вопиюще Богородице таковая:

Радуйся, Солнца Праведнаго первое Сияние,

Радуйся, Лучу преострый, демонских помыслов проницание,

Радуйся, Молние, Света Невечерняго облистание,

Радуйся, Облаче светлый, пути ко Христу указание,

Радуйся, Дне покоя, в нем же Единородный Сын почи,

Радуйся, Херувиме огненный, ко древу Жизни приставленный,

Радуйся, Адаманте, блистающий в венце Царя Небеснаго,

Радуйся, Колеснице, Еюже чистейшее Божество в земная сниде,

Радуйся Пресвятая Дево, рождеством Своим спасение всем возвещающая.

 

Кондак 3

Молитва купно и воздыхание во уши Господни вниде от Иоакима и Анны безчадныя и прозябе Плод живоносен миру. Ов бо молитву на горе творяше, ова же в саде поношение ношаше, обаче с радостию неплоды раждает Богородицу и Питательницу Жизни нашея, вопиюще Богу непрестанно: Аллилуя.

 

Икос 3

Богоотец праведныя Иоаким и Анна по рождестве Твоем, Дево, собраша священницы и книжницы и старцы Израилевы. И тыя благословиша Тя, моляще Бога, да подаст Ти имя именитое в роды родов. Мы же, вернии, составиша пир духовный, со трепетом величаем Тя Возвеличенную, пении таковыми:

Радуйся, Купино, огнем Божества неприступно объятая,

Радуйся, Горнило теплейшее, в немже Христос искован Бысть,

Радуйся, Источниче, изливший пресладкаго Иисуса,

Радуйся, Православия чистаго преславное Исповедание,

Радуйся, Хитоне, имже Сын Божий облеклся еси,

Радуйся, Порфиро Царская, от девственных кровлей уготованная,

Радуйся, Дщере, врачеством матери Своея ставшая,

Радуйся, яко Божие брение, ю исцелившая,

Радуйся Пресвятая Дево, рождеством Своим спасение всем возвещающая.

 

Кондак 4

Таинство странное вижду и преславное: Деву – Младенца пеленами повиту, от Анны руконосиму – Христа Бога Мати, Еюже Царствие Небесное наследуем. Сего ради возопиим Держащему тварь дланьми Своими – всех Богу: Аллилуия.

 

Икос 4

Се Приснодева и Богородица воистину храм Божий и Престол Царев является. Не к тому Адам осуждается и Ева от уз свобождается. Сего ради, покланяющеся святому Рождеству Твоему, Пренепорочная, вопием Ти таковая:

Радуйся, Госпоже, господство от Господа обретшая,

Радуйся, рабо Божия, смиренно Ему служащая,

Радуйся, Слова Божия Носительнице чудная,

Радуйся, Мрежо Христова, от Анны сотканная,

Радуйся, Поточе горний, в горняя устремляющий,

Радуйся, Свете утренний, вечер греху предвещающий,

Радуйся, Гнездо голубицы, от Духа Божия Орла приявшее,

Радуйся, Христа нам неоранно Прозябшая,

Радуйся Пресвятая Дево, рождеством Своим спасение всем возвещающая.

 

Кондак 5

Процвела яко крин в пустыне – бесплодная Анна, Божиим велением, возвещение спасения верным рождеством Твоим, Отроковице, предуготовляюще. Темже просвети нас, в земной пустыне жительствующих, животворящим светом Сына Твоего, Пречистая, да чистыми смыслы с небесными Умы возопиим вси песнь победную Богу: Аллилуя.

 

Икос 5

О, чудо высшее чудес в Назарете совершается: новая Ева – Мариамь Всечестная, высши всей твари соделывается, из Нея же Бог Слово воплотися и с нами поживе. Сие зря Бесплотный, якоже предстоящу ему сему таинству, со страхом взываше к Ней таковая:

Радуйся, небесная земным Соединившая,

Радуйся, идольскаго служения Свободившая,

Радуйся, Дуго, от земли к вышним восходящая,

Радуйся, Иордане истинный Земли Обетованныя,

Радуйся, посреде снегов возраста хладнаго Прозябение,

Радуйся, жемчужины девственныя невлажное Сияние,

Радуйся, Небо, в немже Солнце Праведное скрыша Ся,

Радуйся, яко Тобою Царствие к нам приближися,

Радуйся Пресвятая Дево, рождеством Своим спасение всем возвещающая.

 

Кондак 6

Премудрый воздвиже храм земный, иже аще и величием, и златом блещаху многим, обаче не могий вместити Славы Божия приосененныя. Ты же, Пречистая, яко одушевленное Святилище, Премудростию Божиею от неплодныя Анны устроенное, вмести Невместимаго, Иже плоть от Тебе восприят и упразднив державу смертную, вознесе нас на первое блаженство. Темже дивное чудо славяще, вопием непрестанно Богу: Аллилуя.

 

Икос 6

Имуще ум просвещен пророцы Богоблаженнии, Девы рождение яве провидеша, таинственными образы образуемо: благословен, вопия, Боже отец наших. Темже вещаний древних исполнение на Тебе, Богородице, празднующе, взываем Ти таковая:

Радуйся, Маслина плодовитая, милость миру явившая,

Радуйся, Лампадо, в небесах тепле светящая,

Радуйся, Амфоро, Творцом Себе созданная,

Радуйся, Точило, имже Вино безсмертия источается,

Радуйся, Сосуде, в нем же испечеся Хлеб жизни вечныя,

Радуйся, Ковчеже нетленный, от Бога устроенный,

Радуйся, Скрижале Завета Вышняго,

Радуйся, яко Христу нас Усыновившая,

Радуйся Пресвятая Дево, рождеством Своим спасение всем возвещающая.

 

Кондак 7

Днесь приступим к Деве с Иоанном песнотворцем, глаголюще: «Сия бо воистинну ста Небо и Храм Божества, Сия преграждение вражды разрушивше, мир введе и Царствие отверзе. Сию убо имуще веры Утверждение, Поборника имамы из Нея рождшагося Господа. Дерзайте убо, дерзайте, людие Божии, ибо той победи враги». И верныя прослави, о Тебе вопиющих Богу присно: Аллилуя.

 

Икос 7

Ныне ликуем о святем рождестве Твоем, поюще Сына Твоего, Дево: Имже конечне избавихомся древняго Адамова осуждения. Емуже, яко Богу верно покланяющеся, ублажаем Тя, пении таковыми:

Радуйся, Агнице кроткая, во чреве Анны упасшаяся,

Радуйся, Голубице чистая, превыше небес возлетевшая,

Радуйся, Зерцало святости, Совершеннаго образ являющее,

Радуйся, Покрове, имже истинное девство укрывается,

Радуйся, Скиптре Царский, неверныя устрашающий,

Радуйся, Псалтире, Христа достойно ублажающая,

Радуйся, Воеводо непобедимая, козни диавольския разрушающая,

Радуйся, Росо, пустынныя души орошающая,

Радуйся Пресвятая Дево, рождеством Своим спасение всем возвещающая.

 

Кондак 8

Воистину Богородица в мир раждается и мир Ею обновляется. От Нея же земля множеством Лика Ея изображении покрывается и Православие во Вселенней утверждается, во спасение поющих Богу: Аллилуя.

 

Икос 8

Аще и в горних по прехождении Своем от земли к небесным владычествуеши, обаче и дольних не оставила еси милостию по рождестве Своем, Богородице. Сего ради, Премудрости Божией – Христа Бога нашего благое вместилище Тя ведуще, со архангелы и ангелы, пророки и патриархи и всеми святыми взываем согласно Ти таковая:

Радуйся, Похвало колен израилевых,

Радуйся, Ризо, в нюже Священник Сый оболкийся,

Радуйся, Сновидение Иаковле предивное,

Радуйся, яко Тобою Бог творит преславная,

Радуйся, Мати, девством от Духа венчанная,

Радуйся, Дево, от Него же материнством почтенная,

Радуйся, Пристане, волнений страстей утишение,

Радуйся, Пажите, на ней же Христос возлеже,

Радуйся Пресвятая Дево, рождеством Своим спасение всем возвещающая.

 

Кондак 9

О, дивное чудо! Пресущественнаго Мати от ложесн происходит и Архангел рождество Девы благовествует, неплодныя и нераждающие поношения безчадства свобождаются, земля и небо вкупе общую радость празднуют. Сего ради взываем Богу всяческих: Аллилуя.

 

Икос 9

Небесный Дар от Бога прияша целомудрении родители Богоматери – херувимов превышше Носило и Зиждителя Родительницу, Юже и воспиташа благочестно во храме Сионстем. Ныне, уже в Сионе Небеснем зрят они Дщерь Свою, красотою преукрашенную, всех Царицу, о ней же, радуяся, слышат от ангел пения таковая:

Радуйся, Благословение от семени Авраамова,

Радуйся, Миро, имже помазашеся священство новое,

Радуйся, Купеле Христова, верных овец омовение,

Радуйся, укоризны безчадства Устранение,

Радуйся, Плоде блаженный блаженным родителем,

Радуйся, Ниво неувядаемая в селениих божиих,

Радуйся, Древо родящее – Христа напитавшее,

Радуйся, яко Воду Живую, его внутрь Приемшая,

Радуйся Пресвятая Дево, рождеством Своим спасение всем возвещающая.

 

Кондак 10

Ныне разрешаются узы неплодства, нераждающая материю соделывается, бесчадная родительнецею показася Чада прекраснаго. Радуется Анна, Отроча млеком питающа младодевственное, со Иоакимом вопиюще Богу: Аллилуя.

 

Икос 10

Днесь плодородит Иоаким божественную Юницу, из Неяже пройде Телец, за весь мир закалаемый, алчущия Плотию Своею питающий. Сего ради архангельским гласом благодарственно вопием Ти таковая:

Радуйся, Свете Божественнаго делания,

Радуйся, Цвете, Егоже Господь обоня,

Радуйся, изсохшия стебли Воздвигшая,

Радуйся, двери райския верным Открывшая,

Радуйся, заповедей Божиих нетрудное Исполнение,

Радуйся, ига Христова благое Несение,

Радуйся, демонов тьмы Низложение,

Радуйся,верных в небесах Водружение,

Радуйся Пресвятая Дево, рождеством Своим спасение всем возвещающая.

 

Кондак 11

Приидите чистоты ревнителие, принесите похвальная Деве Богородице, Еюже Иоаким и Анна поношения безчадства свободистася, Адам и Ева от тли смертныя воссташа. Мы же, вины прегрешений прародителевы избавльшеся, немолчно воспоем победную песнь Богу: Аллилуя.

 

Икос 11

Слышавше Давида поюща Тебе, Дево: «Приведутся девы во след Тебе, приведутся в храм Царев», Тобою бо Бог Троица прославляется, Чистая: Отец бо благоволи, Слово вселися, и Божественный Дух Тя осени. Темже с пророком воспеваем Ти таковая:

Радуйся, Духа Святаго святое Стяжание,

Радуйся, главы змия древняго Попрание,

Радуйся, в молитве Богу всегда Пребывающая,

Радуйся, тем умерщвленных грехом Оживляющая,

Радуйся, тихое верным Пристанище,

Радуйся, к Богу благая Ходатаице,

Радуйся, Благословенняа в женах благословенных,

Радуйся, яко обручитель Ти есть Дух Святый,

Радуйся Пресвятая Дево, рождеством Своим спасение всем возвещающая.

 

Кондак 12

О, кия дары земнии принесем Ти, Всесвятая? Еже бо прияша Дар много-ценнейший – Единородное Слово Бога нашего? И пречистому образу рождества твоего, ныне, с любовию покланяющеся Блаженная, дерзнем Ти паки песнь творити благодарственную, о Тебе вопиюще Богу: Аллилуя.

 

Икос 12

Поюще святое рождество Твое, Дево, почитаем и родители Твоя, Богозванная: имиже Плод чистейший, яко палата царская уготовася Неописанному Слову. Темже неизреченному таинству дивящеся, верою взываем Ти таковая:

Радуйся, Начало человеческаго обновления,

Радуйся, Небо умное, из негоже возсия спасение,

Радуйся, Ветве красная, яже процвела Христа плотию,

Радуйся, Мироварнице Божественныя благости,

Радуйся, Чаше неистощимых даров Божиих,

Радуйся, Младоношение священное нераждающим,

Радуйся, ангелов преславное Воспевание,

Радуйся, человеков достойное Величание,

Радуйся Пресвятая Дево, рождеством Своим спасение всем возвещающая.


Кондак 13

О, Всепетая Мати, Иоакима и Анны прозябение Преславное! Приими малое сие моление наше и от всякия скорби, нужды и печали свободи, яко Предстательница еси скорая рода христианскаго. Да Тобою всех бед избавльшеся, едиными усты и единым сердцем воспоем единому Спасителю всех – Богу: Аллилуя (трижды).

За сим читается кондак 1 и икос 1

 

МОЛИТВА

Пресвятей Богородице

О, преблагословенная Дево и Мати! Благодатию Твоею, Юже от Бога обрела еси в преславном рождестве Твоем, отверзи, молим Тя, неплодствующий наш ум, да испросим полезная и достойная душам нашим, яже во спасение и жизнь вечную. Сподоби нас, смиренных и недостойных раб Твоих, одесную стати величествия Твоего, да целование архангелово принесем Ти паки, глаголюще: Богородице, Дево! Радуйся, благодатная Марие, Господь с Тобою! Благословенна Ты в женах и благословен Плод чрева твоего, яко родила еси Христа Спаса, Избавителя душ наших! Емуже со Отцем и Святым Духом слава во веки веков. Аминь.

Или же народом поется молитва "Царице моя Преблагая"

 

 

Вернуться к списку статей